Во населбата Капиштец се уредува зелениот простор на потегот од ТЦ „Зебра“ до ТЦ „Беверли Хилс“. Механизацијата забрзано работи, се прекопува стариот запуштен простор, се прават нови патеки и слични активности.

Неодамна градоначалникот Горан Герасимовски посочи дека се озеленува простор на површина од 7.840 м², а покрај тоа се врши и реконструкција и нивелирање на пешачките патеки. Потоа ќе се постави и нова урбана опрема, нов систем за наводнување, а целиот простор ќе биде осветлен со ЛЕД-светилки, со цел да се подобри видливоста и безбедноста на граѓаните во вечерните часови.

За овие активности ќе се потрошат околу 25 милиони денари или нешто повеќе од 400 илјади евра, средства обезбедени од претходната Влада. Градоначалникот вели дека проектот се реализира на барање на граѓаните и дека ова како предлог центарци го доставиле на ланскиот буџетски форум на кои се прибираа предлози со кои се креираше буџетот за оваа година.

Од граѓанската иницијатива „Шанса за Центар“ уште на почетокот на годинава кога се одобри ваквиот проект реагираа дека тоа се премногу пари за уредување на паркчето и патеките, особено ако се земе предвид дека за сите други паркови и зеленило во општината, за изградба и за одржување се предвидени вкупно околу 100 илјади евра.

На прашањата зошто е одбрана само таа површина наместо со тие пари да се уредува зеленилото во целата општина и како е дојдено до толкава сума за овој зафат, колегите ни одговорија дека така побарале граѓаните и „ако не, па тогаш да ги вратиме парите“. Носењето одлуки за трошење големи суми во општината останува во стилот „Миле ми текна“, наместо да се заснова на балансиран рамномерен развој на сите делови од општината што ќе се темели на проценки, аргументи и факти. Анализи на потребите и придобивките од трошењата се научна фантастика – реагираа тогаш од „Шанса за Центар“.

Сега откако веќе се работи на проектот, од Иницијативата повторно реагираа и го обвинија градоначалникот дека не се објавува јавно проектот и дека со него не се запознаени ни советниците.

Паркчето помеѓу ТЦ „Зебра“ и ТЦ „Беверли Хилс“ веќе се прекопува, а проектот на кој ќе се потрошат над 420 илјади евра, 13 пати повеќе отколку за одржување на целото зеленило во Центар, не се објавува ниту е споделен со советниците иако го бараме од летоска за да видиме што ќе има за толку многу пари – велат од „Шанса за Центар“.

Од Општина Центар ги отфрлуваат овие обвинувања и тврдат дека проектот е достапен не само за советниците, туку и за сите граѓани што сакаат подетално да се информираат што точно се прави во Капиштец.

Проектот е достапен на увид за сите граѓани, вклучително и советниците, во просториите на Општина Центар, во барака 3, секој вторник и четврток од 9 до 11 часот. Увидот може да се направи со претходна најава на телефон 023/203-656 – велат од Центар.

Оттаму објаснуваат и на што точно се трошат овие пари, набројувајќи ги сите активности што се изведуваат и допрва ќе се изведуваат.

 Што се однесува до активностите на терен, моментално се изведуваат пешачки патеки (изведба на ново плато од пешачка патека, прередување, подигнување и нивелирање на постојните патеки), поставување и замена на нова урбана опрема, (клупи, држачи за велосипеди, две нови детски игралишта, канти), поставување лед осветлување, нов систем за полевање, ново зеленило, раскопување на старото и дотраено зеленило, окројување и уредување на веќе постојното зеленило и дрва посочуваат од Општината.

На овој дел од Капиштец, освен што се реконструираше детското игралиште кај ТЦ „Зебра“, со години немаше интервенција на зелените површини. На одредени места освен „гола“ земја немаше останато воопшто зеленило, недостасуваа патеки, а дел од постојните патеки беа уништени.