Случајот со ОМО Илинден-Пирин и одбивањето на бугарските власти да го регистрираат здружението на Македонците во Бугарија повторно беше дел од листата на одлуки на Европскиот суд за човекови прави во Стразбур која што ја разгледуваше Комитетот на министри во Советот на Европа. Случајот се води како „Неоправдани одбивања од судовите да регистрираат здруженија чија цел е признавање на македонското малцинство во Бугарија“.

Комитетот на министри повтори дека случаите со ОМО Илинден-Пирин се однесуваат на „неоправдани одбивања од судовите во периодот од 1999 до 2015 година да регистрираат здруженија, повикувајќи се на националната безбедност, заштита на јавниот ред и правата на другите (целта според судовите е признавање на македонското малцинство и наводни сепаратистички идеи)“. Одбивањата исто така се оправдуваат со уставна забрана на здружување заради политички цели, како и со неисполнување на законските услови.

Комитетот исто така потсетува дека бугарските власти во 2018 година вовеле нова процедура за регистрација на здружениј.а

„Со жалење констатираме дека и покрај усвојувањето Привремена резолуција и носењето последователни одлуки, повеќе од 17 години од првата пресуда, на здруженијата чија цел е признавање на македонското малцинство континуирано рутински им се одбива регистрацијата главно поради поширокиот проблем на неодобрување на нивните цели и се соочуваат со постојана практика на властите да покренуваат нови основи за одбивање во текот на повторените разгледувања на документите за регистрација“, пишува во вчерашната одлука на Комитетот на министри.

Притоа се повторува повикот до бугарските власти да преземат решителна акција за да обезбедат секое ново барање за регистрација на здруженијата апликанти или здруженија со слични цели да се испита во целосна согласност со член 11 од Конвенцијата со јасни упатства до апликантите доколку е потребно, како и во однос на проценката на законитоста на целите на здружението и средствата за нивно остварување.

Комитетот на министри дополнително потсетува дека судовите треба детално и исцрпно да ги идентификуваат, колку што е можно, дефектите на досието за регистрација за да се надмине негативната практика на покренување нови основи за одбивање.

Како што стои во одлуката, претседавачот на Комитетот на министри ќе испрати писмо до неговиот бугарски колега во кое ќе ја нагласи потребата од изнаоѓање брзи решенија за целосно и ефективнпочитување на обврските кои произлегуваат од пресудите на Судот во овие случаи. Истовремено се повикуваат бугарските власти до крајот на декември годинава да обезбедат информации за сите аспекти на овие случаи.

Комитетот на министри и пред помалку од една година побара Бугарија повеќе да не го одбива регистрирањето на здруженија кои имаат за цел „признавање на македонско малцинство во Бугарија“, врз основа на мотиви кои се во спротивност со пресудите на Европскиот суд за човекови права.

Станува збор за пресудите 59491/00 Обединета македонска организација Илинден и други од 19.1.2006 година, конечна на 19.4.2006 година; 34960/04 Обединета македонска организација Илинден и други бр. 2 од 18.10.2011, конечна на 03.8.2012; 29496/16 Обединета македонска организација Илинден и други (бр. 3) од 11.01.2018, конечна на 11.4.2018, 70502/13 Јордан Иванов и други од 11.1.2018 до 11.04.2018; 67197/13 Македонски клуб за етничка толеранција во Бугарија и Радонов од 28.5.2020 конечна на 28.5.2020; 23702/15 Василев и Друштвото на репресирани Македонци во Бугарија жртви на комунистичкиот терор од 28.05.2020, конечна на 28.5.2020 година, кои се разгледуваат како „комплексен проблем“.

Совет на Европа: Регистрацијата на ОМО Илинден-Пирин не е ризик за Бугарија