Жан-Лук Брунел, агент за ангажирање манекенки, кој беше поврзан со сега починатиот американски финансиер Џефри Епстајн, во Франција е обвинет за сексуално вознемирување и силување на малолетнички над 15-годишна возраст.

Брунел беше уапсен во средата на аеродромот Шарл де Гол додека се подготвувал за лет за Сенегал.

Брунел не е обвинет за трговија со луѓе, што беше една од главните точки на истрагата.

Судијата заклучи дека во моментов нема доволно докази за да му се суди по таа точка, а на Брунел му е одреден притвор.

Тој беше под истрага како дел од обемната истрага за наводната сексуална експлоатација на жени и девојчиња од страна на Епстајн и неговиот круг пријатели и соработници.

Неколку жени изјавија дека биле жртви и разговарале со полицијата откако беше отворена француската истрага во август минатата година, истиот месец кога Епстајн изврши самоубиство во затвор.