Во тетовските основни училишта има две паралелки каде настава следат ученици со посебни потреби, останатите деца од оваа категорија се дел од инклузивниот систем во образовниот процес. Некои го посетуваат и Дневниот центар во рамки на објектот на детската градинка „Младост“.

Но, во попладневните часови кога ќе дојдат дома оваа категорија ученици се заклучуваат во своите соби, без можност за интеграција, креација и понатамошна социјализација, вели Бранка Станковиќ од невладината организација „Златна рака.

Таа смета дека во Општина Тетово е повеќе од неопходно да се отвори креативен центар за ученици со посебни потреби.

„Освен инцидентни така да ги наречам креативни работилници кои ние невладините организации ги организираме, за овие деца ништо друго не се презема, мислам на нивна поголема социјализација во попладневните часови кога ќе дојдат од училиште. Затоа недостасува еден креативен центар за овие деца кој ќе фунционира цел ден, каде што тие деца во слободно време ќе доаѓаат тука и ќе ги развиваат своите способности, на децата треба да се им даде подршка, за да ја изразат својата креативна способност. Центарот исто така ќе им помогне на родителите за да ги завршат преку ден своите ангажмани кои што ги имаат. Како е дојдено времето сега двајца родители работаат, некои и во текот на целиот ден, а за децата нема кој да се грижи преку ден. Ако општината обезбеди простор ние ќе се снајдеме за другите обврски“, рече Бранка Станковиќ од невладината организација Златна рака.

Како невладина организација организираме активности за социјализација на оваа категорија деца, но, на нив им е потребна поголема подршка од општеството.

„Нашето здружение иницира многу активности за целокупна интеграција на децата со посебни потреби. Во периодов што следи ќе организираме креативни работилници за децата со посебни потреби. Целта на работилниците, односно целта на проектот „Зрак во темнината“ е да се подигне свеста кај семејствата, но и кај институциите, со цел да им се овозможи поголемо учество на децата во креативниот дел од животот“, рече Гзиме Нуредини од невладината организација Златна рака.

Во рамки на проектот „Зрак во темнината“ ќе се организираат 6 креативни работилници во основните училишта во Тетово, како и во Дневниот центар.