Собранието со 65 гласа „за“ и тројца „против“ ја изгласа техничката влада предводена од Талат Џафери. На седница присутни беа 111 пратеници. Пратениците на ВМРО-ДПМНЕ се воздржаа од гласање на техничката влада, додека пратениците од Левица гласаа „против“. Основна задача на преодната влада е да организра фер и демократски парламентарни избори. Техничкиот премиер Талат Џафери се заложи дека ќе работи одговорно и без манипулации и во ниту еден момент нема да дозволи отстапување од функционална и доверлива институција за граѓаните и институција со јасни надлежности дефинирани со Уставот во однос на другите столбови на власта.

Џафери пред пратениците повтори дека го прифаќа мандатот со задоволство и полна одговорност, со ветување дека совесно и врз основа на Уставот и законите, Владата и преговорите за нејзино формирање ќе ги води согласно политичката потреба и состојба во државата, со надеж дека предложените министри ќе ги исполнат очекувањата на актуелната ситуација и над се, со одговорност кон граѓаните.

Претседателот на Владата и министрите дадоа свечена изјава дека функцијата ќе извршуваат совесно и одговорно и ќе го почитуваат Уставот на Македонија. Џафери и членовите на Владата потоа ги потпишаа свечените изјави.

Славјанка Петревска ќе раководи со ресорот одбрана, Панче Тошковски ќе раководи со Министерството за внатрешни работи, Кренар Лога со Министерството за правда, додека Артан Груби со Министерството за политички систем. Бујар Османи останува министер за надворешни работи, Фатмир Бесими ќе раководи со финансии, Јетон Шаќири со образование, а Ѓоко Велковски со труд и социјална политика. Ристо Пенов продолжува да раководи со локална самоуправа, Бисера Костадиновска Стојчева со култура, Азир Алиу со информатичко општество и администрација, Благој Бочварски со транспорт и врски а Каја Шукова во ресорот екологија.

Министри без ресор се Бојан Маричиќ задолжен за европски прашања, Фатмир Битиќи за економски прашања и Славица Грковска за политики за добро владеење.

Владата во периодот до изборот на идната политичка Влада, Џафери порача дека ќе се фокусира на своите конкретни стратешки и државни приоритети.

Во однос на подготовката и организирањето на слободни, фер и демократски редовни во директна, отворена и законита процедура и соработка со Собранието, ДИК и Мисијата на ОБСЕ/ОДИХР, ЕУ и САД, Владата, вели тој, ќе ги спроведе сите законски, институционални, организациски и оперативни предуслови за спроведување на јасната волја на граѓаните.

Што се однесува на членството во ЕУ и забрзаната европска интеграција, со цел полноправно членство до 2030 година, Владата ќе продолжи да ги спроведува сите процеси и обврски кои произлегуваат од започнатите пристапни преговори. Меѓу нив се обврските што произлегуваат од одржаните билатерални скрининг состаноци, од извештајот на ЕК од скринингот за Кластер 1, како и за другите кластери кои се во процес на подготовка. Тука спаѓа и Патоказот за реформи во јавната администрација и за поглавјата за владеење на правото со Акциски план, и за подготовка на Патоказот за функционирање на демократските институции, се до нивно финализирање – порача Џафери.

Овој состав на Владата го предлага врз основа на меѓусебниот политички договор помеѓу лидерите на најголемите политички парламентарни партии во Собранието, што од 4 декември 2023 година, кога се дефинираше рокот за одржување на редовните претседателски избори на 24 април и 8 мај и на редовните парламентарни избори на 8 мај 2024 година и се донесе одлука за формирање на преодна Влада.