Третирана отпадна вода со врвен квалитет, според европските стандарди и заштеда од протекување, ќе се овозможи со пречистителната станица во Скопје за чија изградба, денеска, со ЕУ грант од 70 милиони евра, се заокружи финансиската рамка вредна над 200 милиони евра. Договорот за грантот го потпишаа министерот за финансии Фатмир Бесими, заменик претседателката на Европската инвестициска банка одговорна за Западен Балкан, Лилјана Павлова и министерката за животна средина и просторно планирање Каја Шукова, во присуство на вицепремиерот за европски прашања Бојан Маричиќ и евроамбасадорот Дејвид Гир.

Откако финансиите се обезбедени, сега треба да заврши процесот на експропријација и урбанистичко-планската документација со Градот Скопје и Општина Гази Баба, но и да се потпишат договорите за градба и надзор од страна на ЈП „Водовод и канализација“.

Реализацијата на проектот, како што беше речено, треба да овозможи подобри услови за живот за околу 540 000 луѓе.

Токму на Светскиот ден на водата, се обврзуваме да бидеме дел од промената која подразбира одговорен однос и заштита на водите. Конечно скопјани ќе ја добијат пречистителната станица, која е од витално еколошко значење. Ова е потврда дека европската интеграција е најдобрата формула за натамошниот развој на земјата, а дека членството во ЕУ не значи само исполнување на критериумите и усогласување со законодатството, туку и конкретна помош за државата и конкретни придобивки за граѓаните. Ги носиме европските стандарди на живеење кај нас. Во чекор сме кон целта на зелената агенда на Западен Балкан – рече вицепремиерот Маричиќ.

Според министерот Бесими грантот доаѓа во време кога финансиските пазари се значително скапи и тоа се средства, како што рече за кои ниту треба да се задолжиме, ниту да платиме камата, а не треба ни да се вратат.

Ова се пари за нашите граѓани, за 500 000 жители во градот Скопје. Ова е уште една потврда дека нашата европска иднина и членството во ЕУ не се само формален или политички процес, туку значат вистинско подобрување на квалитетот на живеење на граѓаните и се јасен сигнал за поддршката што ни ја дава ЕУ – истакна Бесими.

Министерката Шукова рече дека со изградбата на пречистителната станица, ќе се овозможи примарен и секундарен третман на отпадните води во Скопје со што ќе се исполнат минималните барања од Директивата на ЕУ за третман на урбани отапдни води.

Целта на проектот е да даде значаен и мерлив придонес за подобрување на скопската урбана средина и за подобрување на третманот на отпадните води, прочистување и елиминација на милта, а со тоа и подобрување на квалитетот на живот и водните тела – рече Шукова.

И евроамбасадорот Гир потврди дека грантот е уште една практичен пример за поддршката од ЕУ за Северна Македонија.

Откако ќе биде пуштена во функција, пречистителната станица ќе може безбедно да ја третира и прочистува водата за 540 000 жители. Третираната вода ќе има врвен квалитет, согласно европските стандарди. Ќе се намали и протекувањето, па 70 проценти од искористената вода ќе може да се употреби што е од суштинско значење во период на климатски промени и зголемување на урбаното население. Тоа ќе помогне и водата од реката Вардар која тече од Скопје кон Егејско Море да биде помалку загадена, посочи Гир.

Заменик претседателката на Европската инвестициска банка (ЕИБ) Лилјана Павлова потсети дека овој проект досега доби голема техничка помош и поддршка, а во претстојните денови треба да се потпишат договорите за изградба и надзор од Град Скопје и ЈП „Водовод и канализација“.