Попладнево Скопје ќе остане без автобуси затоа што претпријатието нема нафта. Неизвесно е дали тоа ќе се случува и утре, се ќе зависи од тоа дали вечерва или во текот на ноќта ќе се испорача нафта.

Информацијата ни ја потврдија вработени од ЈСП „Скопје“ додека од претпријатието досега сѐ уште нема никаква официјална информација до граѓаните за да не чекаат залудно по автобуските станици.

Нема нафта, повторно излажаа. Автобусите не смеат да да останат на улица, со последните литри нафта мора да се вратат во базите – велат нашите соговорници.

Според нив вистина е дека претпријатието има долг кон снабдувачот „Пуцко Петрол“, но тоа како што тврдат е само една од вистините, а другата е кој и како да го снабдува ЈСП со нафта затоа што договорот со „Пуцко Петрол“ истекува, односно како што велат се работи за „тендерски дубари и политика“.

И додека граѓаните не знаат како денеска ќе се вратат од работа од Град Скопје стигна соопштение во кое велат дека повторно ВМРО-ДПМНЕ креира криза и го остава ЈСП без нафта.

– Нова криза со која го остава ЈСП без нафта, а скопјани без јавен превоз како смислено сценарио за урнисување на претпријатието. Кадарот на шефот на ВМРО ДПМНЕ во Бирото за јавни набавки Маре Богева, креира криза во ЈСП за гориво, со тоа што за прв пат од постоењето на претпријатието ја поништи редовната јавна набавка за гориво во ЈСП како смислено сценарио. Во исто време и со истото смислено сценарио приватните превозници, кои скоро воопшто не сообраќаат поради револт за неразгледување на нивната иницијатива за зголемување на цената по која возат, денес менуваат изјава дека не им биле верификувани извештаи за возење, а кој ќе им ги верификува кога не возат – велат од Град Скопје.

Оттаму додаваат дека за  одлука за зголемување на цена на приватниците може да расправа и да донесе одлука единствено Советот на Град Скопје, предводен од Трајко Славевски од ВМРО ДПМНЕ и Мицковистите.

За потсетување, од моментот кога Мицкоски отпочна да преговара со компанија за набавка на 100 електрични автобуси, кое како и ветувањето за вкупно 250 нови автобуси од програмата за Скопје, се дел од ветувањата на ВМРО-ДПМНЕ за скопјани, отпочна и голготата на претпријатието. Во исто време почнаа и шпекулации за урнисување на ЈСП поради можно сценарио за негова приватизација – тврдат од Градот.

Поради политички пресметки денеска ќе страдаат граѓаните. На нив очигледно никој не мисли.