Фотографиите што осамнаа на социјалните мрежи деновиве покажуваат катастрофална состојба во која се наоѓа Националната универзитетска библиотека „Свети Климент Охридски“ во Скопје. Руинирана, со искршен инвентар, уништен паркет и оштетена внатрешност, повеќе наликува н  напуштен објект одошто на централна национална библиотека во државата.

„Слободен печат“ се обиде да искомуницира со директорот на библиотеката Фремзим Даути, но на повикот одговори неговата секретарка, која веднаш се согласи да испрати писмен одговор на нашето прашање во име на директорот, кој бил зафатен со состаноци.

„Состојбата во читалниците на НУБ Св. Климент Охридски – Скопје е во крајно лоша состојба“, се вели во писмениот одговор од кабинетот на директорот Даути.

„Очекуваме од Владата и Министерството за култура да преземе мерки, т.е. да ги обезбеди финансиските средства и да се реновира целата зграда, а под итно покривот и читалните. Се надеваме дека ова ќе се реализира во најбрз можен рок за да можат читателите да работат, да учат и да истражуваат во нормални услови“, пишува во меилот од директорот на НУБ „Св.Климент Охридски“.

Прашањето како е можно најголемата национална библиотека во земјава, сместена во центарот на Скопје, да се доведе во толку очајна и руинирана состојба, го упативме и од министерката за култура Ирена Стефоска, но до објавувањето на овој напис, оттаму не добивме одговор.