Сè повеќе шпански политичари се под притисок да расчистат со контроверзии околу академските квалификации, откако тројца владини функционери поднесоа оставки поради фалсификувани дипломи, пренесува АФП.

Скандалот започна со Ноелија Нуњез, членка на конзервативната Народна партија (ПП), која пријавила двојна диплома по право и јавна администрација, како и диплома по англиска филологија – за кои подоцна беше откриено дека се лажни. По оставката, ПП побара внатрешна проверка на академските биографии на своите членови.

Сличен случај е и со Хозе Марија Анхел Батаља од Социјалистичката партија, кој тврдел дека има диплома од Универзитетот во Валенсија, иако програмата не постоела кога тој наводно дипломирал. Игнасио Хереро од партијата Вокс, исто така, поднесе оставка поради лажна диплома од непостоечка програма на универзитет во Виена.

Иако законот не бара политичарите да имаат високо образование, јавноста очекува транспарентност и чесност, особено кога академските титули се користат за градење авторитет и политичка доверба.