Владата на Србија усвои нова регулатива, сè што содржи палмино масло ќе биде јасно означено, а граѓаните на Србија наскоро ќе забележат големи промени на полиците во продавниците! Овој пропис воведува серија нови задолжителни правила во врска со млечните производи, пекарските производи со филови и пиците што содржат млечна компонента, а ќе се применува од 1 август 2025 година, објави Србија данас. Според новите прописи, сите производи што содржат палмино масло – како што се некои видови сирење, млечни намази, бурек, пити, полнети колачи и пици – ќе мора да бидат јасно означени и прикажани одделно од производите направени исклучиво од млечни состојки.

На овој начин, потрошувачите ќе можат јасно да разликуваат што содржи растителни масти и што содржи млечна компонента, што, според законодавците, го штити правото на граѓаните на точни информации за составот на храната. Владата го прецизираше целосниот список на производи што подлежат на новите правила: Ферментирани млечни производи, бурек, пита, полнето тесто, стапчиња, лиснато тесто, меко тесто, ѓевреци, пици што содржат млечни компоненти. Доколку овие производи содржат растително масло или маст, особено палмино масло, тие ќе треба да бидат етикетирани и одвоени на полиците. Една од најважните промени се однесува на забраната за употреба на сликовни претстави на млечни производи на пакувањето на оние што содржат растителни замени, со што се спречува потрошувачите да бидат заведени.