Претседателката на државата, Гордана Сиљановска-Давкова, на манифестацијата „Текстилијада“ во Штип рече дека државата мора да ги заштити правата на работниците и да ги искорени неправилностите, особено во текстилната индустрија. И покрај напорите, многу работници сè уште се соочуваат со плати под законскиот минимум, а здруженијата повикуваат на поголема заштита и унапредување на работничките права.

„Силата на едно општество не се мери само преку економијата, туку преку вредностите што ги споделуваме како социјална држава. Нашата задача е да создадеме Македонија која ќе ги почитува правата на сите, без оглед на политичките разлики,“ порача Сиљановска-Давкова.

Таа додаде дека синдикатите и здруженијата мора да останат непоколебливи во нивната борба за работничките права.

И покрај напорите на институциите, многу работници во текстилната индустрија сè уште не ги добиваат своите загарантирани права.

„Платите се под законскиот минимум, а ситуацијата е далеку од добра, вели Кристина Ампева, претседателка на здружението „Гласен текстилец“.

Според неа, треба да се дискутира за „плата за живот“, а не за минималец, и да се донесат одржливи решенија кои ќе ја подобрат состојбата на работниците.