Националната опера и балет в петок на 13 септември ќе гостува на сцената на Софиската опера и балет со грандиозната опера „Набуко“ од Џузепе Верди. На гостувањето на НОБ во Софија ќе присуствува и претседателката Гордана Сиљановска Давкова и во таа прилика најверојатно ќе оствари и билатерална средба со својот домаќин, претседателот на Република Бугарија, Румен Радев.

Двајцата претседатели се очекува заедно да седат во публиката, но засега нема потврда од нивните кабинети.

Претседателката во оваа прилика ќе биде придружувана од министерот за култура Зоран Љутков и од министерот за надворешни работи Тимчо Муцунски.

Спектакуларната опера „Набуко“ во Софија ќе се изведе под диригентската палка на Бисера Чадловска, а адаптацијата на сцената на Софиската опера ја направи Трајко Јордановски.

Ќе настапат: Марјан Јованоски, Злата Тошевска Димовска, Николина Јаневска, Зоран Сотиров, Игор Дурловски, хорот, оркестарот, балетскиот ансамбл на Националната опера и балет и ученици од ДМБУЦ „Илија Николовски – Луј“.

На Мајските оперски вечери во Скопје, пак софиската Опера и балет гостуваше со операта „Валкира“ и предизвика воодушевување пред скопската публика.

Во таа прилика претседателката Сиљановска Давкова го потенцираше значењето на културната дипломатија.

– Не мислам дека минатото ни е романтично, ни вашето ни нашето, но мораме да живееме денес и да работиме за иднината – изјави Сиљановска Давкова на 17-ти мај годинава непосредно пред изведбата на операта „Валкира“ во Националната опера и балет.

Двајцата претседатели требаше да се сретнат во Рим за време на нивната посета по повод Денот на светите браќа Кирил и Методиј, но средбата никогаш не се случи.