Унгарскиот министер за надворешни работи Петер Сијарто ги предупреди денеска европските политичари кои „ја напаѓаат мировната позиција на унгарската влада“ да не „го попречуваат успехот на мировните преговори“ меѓу Русија и Украина.

Додека Унгарија повеќе од три години се залага за прекин на огнот и мировни преговори, Брисел и Европејците ја напаѓаат Унгарија поради тоа, напиша Сијарто на Фејсбук, се вели во соопштението на унгарското МНР.

„Но, изборот на Доналд Трамп донесе надеж за мир. Благодарение на Доналд Трамп, сега има директни разговори меѓу Американците и Русите и меѓу Русите и Украинците. Ова веќе го направи светот побезбедно место“, рече Сијарто, според МТИ.

Тој рече дека сите се свесни дека мировните преговори ќе бидат тешки, поради што ги повика Брисел и европските политичари да не го попречуваат успехот на мировните преговори. Унгарската влада, рече тој, ќе продолжи да прави се што може за да ги поддржи мировните напори на американскиот претседател.

Сијарто додаде дека се надева оти разговорите ќе доведат до прекин на огнот што е можно поскоро и на крајот до сеопфатен мировен договор, пренесува Танјуг.