Денес на централниот плоштад Тјенанмен во Пекинг се одржа голема воена парада по повод Денот на победата во Втората светска војна, по повод 80-годишнината од победата на Кина над фашизмот. Церемонијата ја отвори претседателот Си Џинпинг на Народна Република Кина, нагласувајќи дека „подемот на Кина и подмладувањето на нацијата се неповратни и незапирливи“.

Во говорот пред домашните и странските делегации, Си нагласи дека Кина останува посветена на мирот и стабилноста, но дека мора да има првокласна армија, „армија што ќе го штити кинескиот народ и ќе придонесе за зачувување на светскиот поредок“.

– Кинеската нација е голема нација. Во најтешките историски околности, таа знаела како да се бори и да се издигне, не само за себе, туку и за човештвото. Денес, светот се соочува со избор – војна или мир, дијалог или агресија. Ние го избираме патот на мирот, но во исто време градиме сила што ќе спречи повторување на трагедиите од минатото – рече Си.

Тој потсети дека „историјата е минато кое предупредува и ја осветлува иднината“, нагласувајќи дека е потребно да се отстранат корените на војната за да се спречи нејзино повторување.

– Под водство на Комунистичката партија на Кина, мора да се придржуваме до марксизмот, учењата на Мао Це Тунг и новата ера на социјализам со кинески карактеристики. Само на овој начин можеме да го изградиме кинескиот пат против агресијата и да ја обезбедиме благосостојбата на народот и земјата – рече кинескиот претседател.

На парадата присуствуваа лидери на 26 земји. Присуството на бројни државници ја покажува важноста на овој настан не само за Кина, туку и за глобалната политичка сцена.

Си заклучи дека „големото подмладување на кинеската нација е историска мисија“ и дека „благородната цел за мир и развој на човештвото сигурно ќе триумфира на крајот“.