Шведски консултант за технологија денеска е осуден во Гетеборг на три години затвор за давање чувствителни информации на Русија за производителот на камиони Сканија.

Ова е прво судење за шпионажа во Шведска во последните 18 години, јави државната телевизија СВТ.

Мажот (47), чие име не е соопштено, беше уапсен во февруари 2019 година додека вечераше во ресторан во центарот на Стокхолм со руски дипломат.

Рускиот дипломат, осомничен дека е разузнавач кој работел со изворот со години, исто така беше накратко приведен, но бил ослободен кога се повикал на дипломатски имунитет.

Во моментот на апсењето, шведскиот консултант само што зел 2.700 евра за пренесување информации на Москва, објасни шведскиот обвинител во февруари.

Според судот, Швеѓанецот копирал „тајни документи” од Сканија, кои потоа ги ставал на УСБ за да му ги предаде на службено лице во руската Амбасада.

Тој бил „целосно свесен дека Русија ќе има корист од информациите што ги дал”, соопшти судот.

Човекот, кој ги негираше обвинувањата во текот на судењето, исто така беше обвинет за давање информации за производителот на автомобили Волво Карс, но беше ослободен од обвиненијата.

Во годишниот извештај објавен во 2020 година, шведската разузнавачка агенција проценува дека Русија, заедно со Кина, претставува најголема закана за Шведска кога станува збор за разузнавачки активности.