Одбраната на Раде Трајковски Штекли до судот доставила психијатриско вештачење дека Штекли кој е обвинет за трговија со дрога не бил психички способен да го следи судскиот процес против него.

Но, обвинителството од судот побара денеска во притвор во Шутка да го посетат психијатри и да направат дополнително вештачење дали Штекли е или  не е психички способен да го следи судењето.

Како што брифираше обвинителката судот треба на подготвително рочиште да одлучи дали ќе прифати некое од вештачењата или ќе бара супер вештачење.

Иако прво се кажа дека Штекли бил неконтактибилен и со брза помош бил однесен на неврологија и се чекаше да му заврши прегледот, судијата по повеќе од час и половина кажа дека Штекли уште не бил однесен ни во болница.

Од затворот Скопје добивме информација дека обвинетиот Трајковски сè уште не е пренесен во болница бидејќи чекале асистенција од МВР за да можат да го однесат. Чекале началникот на СВР Скопје Сашо Топаловски да потпише наредба да дојде полициска асистенција да го однесе во болница- рече судијата Илија Трпков.

Претходно соопшти дека го одложува судењето за околу еден час бидејќи Штекли бил однесен во болница со брза помош.

Судењето се одложи за во август.