Македонската софтверска компанија „Сајтрокс“, која неделава беше блокирана од страна на Фејсбук поради шпионирање на корисниците, произведува шпионска апликација наречена „Предатор“, – едно од најмоќните и најактуелните алатки за шпионирање во светот, покажува истражувањето на новинарите и компјутерските експерти на веб-страницата Citizen Lab.

Во истражувањето е наведено дека компанијата „Сајтрокс“, која е подружница на унгарска фирма, е поврзана со израелски капитал и со поранешни припадници на специјалните сили на израелската војска. Цитиран е и напис во „Форбс“ од 2019 година, во кој се вели дека фирмата „Сајтрокс“ била „спасена“ од страна на Тал Дилијан, поранешен командант на единицата 81 на Израелските одбранбени сили, кој вложил во македонскиот стартап во 2018 година, а подоцна го вклучил во моќна алијанса на производители на шпионски софтвер, наречена Интелекса.

Софтверот на „Сајтрокс“, „Предатор“ е искористен за напад врз телефонот на египетскиот политичар, поранешен претседателски кандидат и дисидент Ајман Нур, покажа истражувањето на Citizen Lab. Македонската компанија, за која се вели дека е „претходно малку позната“ во секторот на „хакери-платеници“, своите услуги ги продава на влади низ целиот свет, а нејзиниот „Предатор“ во случајот на Нури бил користен од нејзин клиент египетска државна институција. Во исто време, телефонот бил „заразен“ и со друга апликација, „Пегасус“, развиена од конкурентската NSO Group, а користен од друга египетска државна институција, се вели во истражувањето.

Покрај случајот на Нур, докажано е дека со „Предатор“ е хакиран и телефонот на познат египетски ТВ-водител и новинар, кој сакал да остане анонимен.

„Сајтрокс“, фирмата која вели дека на владите и компаниите им продава „системи на сајбер-разузнавање дизајнирани да нудат безбедност“, е основана во Скопје во 2017 година. Според податоците од Централниот регистар, основач на оваа фирма за развој на софтвер е унгарска компанија, основана во Будимпешта и именувана како „Сајтроск Холдингс Командитно Акционерско друштво“ со паричен влог од 25 илјади евра. Основна дејност на скопската фирма и е компјутерско програмирање, а нејзин управител е Иво Малинковски, објави Радио Слободна Европа.

Фејсбук вчера, откако беше објавено истражувањето на Citizen Lab, соопшти дека македонската ИТ фирма која развива малициозен софтвер за паметни телефони, е блокирана поради злоупотребата на социјалната платформа за шпионажа на корисниците. Станува збор една од седумте фирми кои ја искористиле нејзината платформа за да шпионираат 50.000 луѓе во 100 земји.

Според истражувањето на Citizen Lab, „Сајтрокс“ има клиенти во Ерменија, Египет, Грција, Индонезија, Мадагаскар, Оман, Саудиска Арабија и Србија.