Шпанскиот гигант за челик „Сиденор“ објави целосен прекин на продажбата во Израел, наведувајќи го јавното негодување поради бруталната воена кампања на Израел и растечките докази за злосторства против Палестинците. „Сиденор“ во вторник објави дека ќе ја прекине целата трговија со Израел.

Локалните медиуми објавија дека одлуката следела по откритијата дека компанијата испорачала 1.207 тони челични прачки на израелскиот производител на оружје „ИМИ Системс“ во период од 10 месеци, почнувајќи од август минатата година- пишува Кликс.ба.

Баскискиот „Сиденор“, еден од најголемите специјализирани производители на челик во Европа, го потврди потегот преку радиодифузерот „Кадена Сер“.

Компанијата соопшти дека финансиското влијание ќе биде занемарливо, со оглед на тоа што израелската продажба претставува помалку од 0,5% од вкупните приходи.

Тие рекоа дека одлуката е во согласност со апелот на шпанската влада за прекин на трговијата што ја поддржува воената машина на Израел.

„Сиденор попушти пред општествениот притисок“, објави шпанскиот министер за потрошувачки прашања Пабло Бустиндуј на Блускај.

Тој рече дека сè уште чека одговор од шефот на шпанската бизнис конфедерација на барањата за „прекинување на сите врски меѓу шпанските компании и окупацијата, апартхејдот и геноцидот врз палестинскиот народ“. Шпанија ја прекина продажбата на оружје на Израел од почетокот на офанзивата во Газа, иако извештаите покажуваат дека некои договори остануваат активни. Мадрид се појави како еден од најжестоките критичари во Европа на немилосрдниот израелски напад, во кој загинаа повеќе од 56.600 луѓе, а стотици илјади останаа на работ на глад.