Најмалку шест тела, вклучувајќи и едно дете, се пронајдени откако брод со 40 до 50 мигранти потона покрај брегот на Доминиканската Република, соопшти во неделата службата за цивилна заштита на карипската земја. Операциите за пронаоѓање на исчезнати лица продолжуваат.

Претходниот официјален биланс, објавен во петокот, за бројот на жртви беше четири лица, тројца мажи и една жена. Седумнаесет лица, седум Хаиќани и десет Доминиканци, беа спасени.

Малиот брод се движел кон Порторико, соседен карипски остров и посед на САД, на 130 километри од источниот брег на Доминиканската Република, кога потонал.

Според преживеаните, на него имало 40 до 50 лица. Властите сè уште не го потврдиле точниот број на лица на бродот.

„Видовме луѓе како чудесно се појавуваат по четири, пет или шест дена“ во претходни поморски несреќи, изјави за АФП директорот за цивилна заштита Хуан Салас на третиот ден од потрагата по преживеани.

Преживеаните рекоа дека имало и други живи во водата, а властите не исклучија дека некои успеале да се држат за пловечки предмети или дури успеале да отпливаат назад до брегот .

Малите чамци што превезуваат мигранти, направени од дрво или фиберглас, се познати како „јола“, што во последниве години во сленгот почна да значи и бродолом или несреќа. Понекогаш дури и до 100 луѓе се качуваат на вакви чамци.

Според извештаите, нелегалните имигранти им плаќаат до 7.000 долари на шверцерите за да се обидат да стигнат до Порторико по море, барајќи подобра иднина.