Нема повеќе возење на моторни возила во строго заштитени зони, поголема контрола на сечата на шума која досега најчесто била на своја рака, крај на изградбата на нови хидроцентрали, регулирање на користењето на шарските извори – ова се само дел од програмите на амбициозниот десетгодишен план за заштита и развој на Шара, подготвен од Националниот парк „Шар Планина“.

Планот има осум основни програми. Заштитата на планинското подрачје сега ќе биде приоритет, а тоа ќе создаде услови за развој на планинскиот масив, велат од раководството на установата.

„Моторните возила што влегуваа во строги заштитените зони, тоа веќе нема да биде дозволено, досега тие се движеа низ цела Шара и сега за да го заштитиме дивиот свет, секако ќе треба да се забрани тоа. Активностите за сечата, таа се одвивала без земање на дозвола, навиките се такви. Податоците што ги имаме говорат дека досега од 4 % до 6 % од луѓето се снабдувале со дрвна маса со дозвола, а останатиот дел бил без дозвола. Во меѓувреме донесовме одлука цените да бидат пониски за снабдување со дрвна маса. Околу заштитата на изворите, секако ние соработуваме со другите институции со министерствата, кои даваат дозволи за користење на изворите, но ние треба да бидеме на терен и да ги информираме институциите околу состојбата со водата. Хидроцентралите, сега тие што се изградени ќе останат, но од новата министерка за животна средина добивме поддршка дека нема да имаме други хидроцентрали, односно нема да се градат нови во заштитени подрачја. Нашиот став е и за тие што добиле концесии, а не со докрај изградени да запре постапката, да нема продолжување на градежните дејствија. Ние нема да дадеме позитивно мислење за тие да продолжат да се градат“, вели Ибрахим Дехари, директор на НП „Шар Планина“.

Развојот на Шар Планина може да започне само ако се создадат услови на планината каде ќе се запрат девијантните појави. Никој не сака да планинари низ планина која е оголена, каде има дива сеча, велат од установата. На туризмот треба да му се даде приоритет, но неговиот развој треба да се одвива по строги утврдени правила.

„Пред неколку месеци се објави дека ќе се развива Ски – центарот Попова Шапка. Сето ова од наша страна е исконтролирано и е утврдено дека тој развој е исклучиво во Бафер-зоната и само тука ќе биде тој развој на туризмот. Се надеваме дека ќе се обнови жичарата, за да се намали притисокот врз самата планина. Има и други форми на алтернативен туризам, како што е еколошки форми на туризам, развој на пасишта, престој на туристи во локални места, за да оставарат економски бенефит мештаните. Потоа има јавање на коњи, пчеларство, паша итн. Во овие неколку месесеци евидентираме голема штета на шумите, екосистемите се деградирани, ќе треба да поработиме на подобрување на средината за туристите, за тие да уживаат во овие предели. Таа сеча на шума треба да биде невидлива со голо око. Голем проблем е отпадот, за да ја направиме Шара атрактивна и да дојдеме до компонентата – развој на Шара, треба на окото да му биде пријатен просторот. Реално, населението нема каде да го одложи отпадот, ќе треба поинтензивно да се работи со општините, отпадот да завршува на друго место, а не на планините и по реките. Ние планираме чистење на неколку локации, каде евидентиравме големи депонии, рече Анела Панајотова, раководител на одделение за заштита на природата при НП „Шар Планина“.

Моментално целиот Шарпланински масив го чуваат и контролираат осуммина луѓе, колку што има и вработени во Националниот парк.

Финансиски установата се одржува со помош на донатори и Владата, а очекува нови вработува во текот на годинава.