Падот на настрешницата на свежо реконструираната зграда на Железничката станица во Нови Сад која усмрти 15 лица беше само повод за протестите во Србија. Протестите кои добиваат се поголема масовност и долготрајност против владеењето на Александар Вучиќ се повеќе се споредуваат со протестите што се случија во Македонија пред речиси десет години против владеењето на Никола Груевски.

Релативно новата власт предводена од ВМРО-ДПМНЕ е воздржана за протестите во Србија, единствено за нив поддршка стигна од нивните колеги во Македонија. На 30 декември тие одржаа симболичен протест пред српската амбасада во Скопје во знак на поддршка на студентските протести.

Случувањата во Белград, Нови Сад, Ниш и други српски градови, домашните студенти ги поврзуваат со примерот на Студентскиот пленум, кој беше иницијатива за одбрана на правата на студентите и се залагаше за поквалитетно образование, борба против неправдата и партиските влијанија.

На социјалните мрежи се споредуваат протестите во Србија и „Шарената револуција“, со предупредувања до српските граѓани, овие протести да не завршат на полошо.

Универзитетската професорката и композиторка Дарија Андовска на нејзиниот Фејсбук профил напиша дека од она што го гледа кај нив се спроведува истото сценарио кое беше спроведено во Македонија пред 10 години кое почна со студентите.

-Драги пријатели од Србија, верувам дека имате многу причини да бидете револтирани и да сакате промени. Верувам и дека мислите дека не може полошо од ова што ви се случува во моментот. Драги пријатели од Србија, кај вас се спроведува истото сценарио кое беше спроведено во Македонија пред 10 години, кое исто така почна со студентите. Тоа и не е така одамна и ние не сме така далеку, за да не знаете и да не се сеќавате – напиша таа.

Андовска посочи дека таквото сценарио на нас ни донесе насилна промена на уставното име, и им порача на нејзините пријатели да бидат попаметни.

-Нам тоа сценарио ни донесе насилна промена на уставното име Македонија, тешки криминалци и глупаци на власт, секојдневни скандали од епски размери, ненаситни изроди кои ја уништија Македонија од речиси секој аспект. Да, борете се за подобро. Но, да, бидете попаметни од нас. Ние немавме од кого да го видиме сценариото и резултатите. Вие имате. Со среќа – додава таа.

Професорката Мирјана Најчевска која беше дел од „Шарената револуција“ за „Слободен печат“ анализира дека двата протести почнале од студентите и дека нивната цел е иста – да биде симнат режим.

-Идејата на прекинување на постојан избор на една иста владејачка структура којашто очигледно почнува да манифестира диктаторски елементи е најголемата сличност. Тоа што се почна со студентите, потоа им се придружуваат граѓани исто така е голема сличност со протестите во Македонија, кои започнаа баш со протестите на средношколците, продолжија со студентите и на тоа се надоврза „Шарената револуција која ги поддржа и овозможи да се симне режимот. Така да, да. Гледам големи сличности, вели Најчевска.

Таа не се согласува дека протестите на „Шарената револуција“ биле залудни или дека биле злоупотребени. Според неа, таа ја постигнала својата цел.

-Го симнавме режимот, како може да биде залудна ако сме ја постигнале целта. Целта на „Шарената револуција“ не беше да постави некој на власт, да се донесе конкретна партија, туку да симне партија и да овозможи демократските институции да создадат услови за слободни услови затоа што веќе во неколку наврати немаше слободни и фер избори во Македонија што беше идентификувано и од страна на меѓународните набљудувачи. Значи целите сепак беа исполнети да се симне режим кој почна да личи многу на фашистички режим и да се овозможи граѓаните слободно да си изберат. Ништо повеќе и ништо помалку – додава професорката.

Децидна е дека оваа револуција не го донела на власт поранешниот премиер, Зоран Заев.

Горан Илијевски, претседател на Партијата на Македонците во Србија вели дека ги поддржува масовните протести и смета дека таква масовност не може да биде инструирана и манипулирана, со оглед на тоа што студентите ги поддржаа 4,000 професори кои тешко дека би биле манипулирани.

-Од една страна имате младост, интелектуалци, иднина на Србија, која никој не може да ја купи или уцени. Од друга страна изманипулирани, купени и медиумски константно излажани пензионери и ситни луѓе кои од интерес или поради менталниот склоп потпаднале на популизмот на отуѓената власт. Исходот е многу јасен. Македонците во Србија се апсолутно со младите и умните, со иднината, а против корупцијата и криминалот. Ние сме со српскиот братски народ. Вучиќ не е Србија, Србија е народот, студентите, учениците, земјоделците професорите кои излегоа во огромен број. Бројката ја покажува сериозноста на протестите, никој толку народ не може да манипулира – вели Илијевски.

Најчевска смета дека логично би било протестите во Србија да резултираат со промени.

-На луѓето веќе им е преку глава од една транвеститското владеење кое го манифестира Вучуќ, изигрување на демократијата и оддалечување на Србија од сите вистински демократски принципи и од владеењето на правото. Така што, да, очекувам да прераснат и во нешто повеќе, што не значи дека тоа и ќе се случи со оглед на тоа силата на Вучиќ е многу голема и структурите со кои тој располага се многу моќни, вели таа.

„Шарената револуција“ почна како резултат на одлуката на претседателот Ѓорге Иванов да прогласи аболиција за сите осомничени и обвинети политичари во истрагата за незаконското прислушување. 100 000 луѓе вчера се собраа на повик на студентите од белградските факултети да побараат исполнување на барањата да се дознаат деталите за несреќата во Нови Сад каде во падот на натстрешница во Нови Сад на почетокот на ноември загинаа 15 лица.

Градежниот факултет во Белград неодамна ја анализираше достапната документација објавена од властите и тврди дека недостасуваат клучни ставки. На протестот одржан на белградскиот плоштад „Славија“ им се придружија земјоделци, медицински работници, актери, уметници и жители на Белград и околните градови.

Ова е најголемиот настан во историјата организиран од студентите во Србија. Протестите во Србија кои собираат дури и по 100 илјади граѓани се оценуваат како најголемиот предизвик за Вучиќ од доаѓањето на власт во 2012 година. Падот на Никола Груевски пак во Македонија дојде по „Шарената револуција“, но и „бомбите“ што ги пушташе опозицијата.