Пред два дена во српската Влада се одржа првата седница на Кризниот штаб за превенција, сузбивање и искоренување на шап и лигавка, со која претседаваше министерот за земјоделство, шумарство и водостопанство д-р Александар Мартиновиќ. На предлог на министерот, на средбата е договорено воспоставување СОС линија во рамките на Ветеринарната управа на Министерството за земјоделство.

Граѓаните со јавување на телефонскиот број 011/311-7100 ќе можат да се информираат за оваа болест, за превентивните мерки и активности во случај на сомнителна инфекција, а целта е навремена реакција и превенција од појава и ширење на болеста. Како што се наведува во соопштението, Ветеринарната управа еднаш неделно до членовите на кризниот штаб ќе испраќа извештаи за актуелната состојба и планираните понатамошни активности. Кризниот штаб ќе заседава најмалку еднаш месечно, пишува Политика.

Како што се наведува во соопштението, во овој момент е неопходна соработка и взаемна поддршка на сите надлежни државни органи, ветеринарни служби и кризни центри на национално, регионално и локално ниво, а од клучно значење е максимално да се зголеми ефикасноста на сите во секторот во смисла на навремено и итно ангажирање на средства, работна сила и опрема. Мартиновиќ истакна дека во Србија не се регистрирани ниту сомнителни ниту потврдени случаи на оваа болест, а последниот случај на шап и лигавка е регистриран во 1996 година на територијата на Косово и Метохија.

– Но, поради регистрирање на случаи на зарази, најпрвин во Германија, во јануари годинава, а потоа и во Унгарија во март, а имајќи предвид дека шап и лигавка е една од особено опасните заразни болести, која се карактеризира со нагло и брзо ширење, државата постапува според првото ниво на тревога и ги презема сите превентивни мерки за спречување на појава и ширење на шап и лигавка – истакна Мартиновиќ.