Ким Џонг Ун изврши инспекција на првиот воен шпионски сателит на Северна Кореја и даде зелено светло за неговиот „иден акционен план“, објавија државните медиуми во Пјонгјанг.

За време на посетата на севернокорејската воздухопловна агенција, тој нагласи дека извидувањето од вселената е клучно за спротивставувањето на САД и Јужна Кореја, пренесува АП.

За време на посетата во вторникот, Ким одобри неодреден „иден акционен план“ како подготовка за лансирање на сателитот, соопшти севернокорејската новинска агенција КЦНА.

Пјонгјанг не го објави датумот за лансирање, што според некои аналитичари би можело да биде во следните неколку недели.

Фотографиите објавени од весникот Родонг Синмун во вторникот покажуваат дека Ким и неговата ќерка, облечени во бели лабораториски мантили, разговараат со научниците во близина на објект што се чини дека е главна компонента на сателитот.