Во Пехчево успешно е извршена дислокацијата на гнездото на штрковите кое се наоѓаше во фабриката „Фагус”.

Акцијата ја реализираа вработени од претпријатието, а активистката Жаклина Реџовска изрази задоволство што штрковите се преместени на безбедна локација.

-Ова е доказ дека се вклучуваме во цивилизациските текови. Браво за дечките од „Фагус” за успешното преместување на штрковите на безбедно, изјави Реџовска.

Во слична акција на иницијатива на активистката, пред две години гнездо на штркови беше дислоцирано од електричен столб во беровското село Ратево.

-Да се надеваме дека од петте јајца кои ги забележавме во гнездото, барем две нови штркчиња ќе ги појават главите од гнездото, рече Реџовска.

Годинава во Пехчево сѐ почесто се гледаат нови штркови кои градат гнезда на повисоките згради, како и на столбои и дрвја во околината на градот.

Ваквите и слични интервенции за дислокација на загрозени гнезда на птици-преселници се честа појава во последните години во Пијанец и Малешевијата, јавува дописничката на МИА.