Финска испиша златна страница во својата кошаркарска историја, пласирајќи се во полуфиналето на Европското првенство за првпат досега, откако во четвртфиналната пресметка ја совлада селекцијата на Грузија со убедливи 93-79.

Финците одиграа максимално зрел и дисциплиниран натпревар, со што ги разбија сите надежи на противникот за пласман меѓу најдобрите четири. Триумфот предизвика вистинска еуфорија во нивната татковина, каде кошарката доживува вистински подем.

Селекторот Ласи Туови не го криеше задоволството по историскиот успех, но и откри дека до победата на Србија во осминафиналето во нивната земја не ги следеле премногу.

„Овој момент го сонувавме со години. Горди сме на сè што постигнавме. Сè се смени по победата над Србија, одеднаш интересот за кошарка експлодира, дотогаш речиси никого не го интересираше. Благодарен сум на сите што нè поддржаа, но и на целиот стручен штаб“, изјави Туови.

Финска за место во финалето ќе игра против Германија во натпреварот кој е закажан за утре во терминот од 16:00 часот. Во второто полуфинале од 20:00 часот силите ќе ги одмерат Грција и Турција.