Општина Ѓорче Петров денеска започна со асфалтирање на улицата 52 во Стопански Двор. Улицата која има шест краци, како што информираат од Општина Ѓорче Петров, конечно ќе добие нов асфалт на главната артерија, а потоа и на краците во должина од приближно 1.200 метри или над 3.000 метри квадратни површина.

Оттаму велат дека Општина Ѓорче Петров досега самостојно реконструираше над 60-тина улици на нејзина територија со што значително се подобрила инфраструктурата во општината.

Пружената рака со граѓаните е наша заложба дека ќе го решиме нивниот проблем. Никогаш не ветувам ако не можам да остварам, и никогаш не отстапувам ако ветам. Денеска на мое задоволство остваривме уште едно ветување за кое долги години се бараше решение, проблем кој се провлекуваше со години и никој сериозно не се заложи да им го реши на граѓаните на улица 52 во Стопански Двор – рече градоначалникот Александар Стојкоски.

Тој истовремено најави и нова градежна офанзива во сите делови на Ѓорче Петров.