Во таборот на Барселона повторно владее неизвесност и повторно во фокусот е шпанскиот репрезентативец Дани Олмо (27), чие право на настап за каталонскиот гигант одново доведено во прашање. Како што пренесува „Мундо Депортиво“, Олмо во моментов е само привремено регистриран за новата сезона во Ла Лига, додека за 1 септември е закажано судско рочиште кое може да биде клучно за неговиот статус.

Доколку пресудата биде неповолна за Барселона, клубот ќе мора веднаш да го избрише Олмо од списокот на регистрирани играчи, што би значело дека плејмејкерот нема да смее да настапува во целата есенска полусезона. Единствена можност за повторна регистрација би се отворила дури во јануари, кога стартува зимскиот преоден рок.

Слични проблеми со регистрацијата на поранешниот играч на Лајпциг Барселона имаше и во претходната сезона. Олмо тогаш доби зелено светло да настапува само по исклучок, поради повредата на Андреас Кристенсен, но дозволата важеше само до 31 декември 2024 година. Во јануари 2025 година, Барса не успеа да обезбеди продолжување, а ситуацијата беше привремено решена со одлука на највисокиот шпански спортски суд.

Како што потсетува „Мундо Депортиво“, клубот засега нема обврска повторно да го пријавува Олмо, бидејќи сè уште важи решението на Советот за спорт на Шпанија (CSD) од 3 април. Тогаш беше прифатена жалбата поднесена од клубот во јануари, што му овозможи на Олмо да ја заврши минатата сезона и да настапи во првите две кола од новата.

Сепак, сè може да се промени по 1 септември, кога треба да биде донесена конечната одлука на Националниот суд. Ла Лига поднесе барање за привремени мерки на 23 април до Управниот суд, но тој се прогласи за ненадлежен и случајот го префрли на Националниот суд. Причината е што одлуката на ЦСД тогаш ја потпиша државниот секретар за спорт и претседател на Советот, Хосе Мануел Родригез Урбес.