28-годишниот Миле Тодоров од Неготино и натаму е исчезнат, повеќе од три месеци откако му се изгуби трагата на 30 јануари, среде бел ден. Неизвесноста за неговата судбина го прогонува неговото семејство, а како минува времето, за случајот почнува да заборава и јавноста. Сè поретки се апелите за каква било информација поврзана со него, како и објавите на неговата фотографија, кои во првите два месеца ги преплавија социјалните мрежи и медиумите, пишува „Фокус“.

Тодоров утрото тргнал на работа во фирмата „Метал Апостолов“ во Кавадарци, каде му кажал на сопственикот дека дава отказ, по што заминал пеш во правец на Неготино, а трагата му се губи на патот кај Марена, според очевидци и снимки од надзорни камери. Тоа е сè што јавноста дозна за неговото последно движење, а обемните потраги на терен со стручни тимови и бројни доброволци, не дадоа одговори. Телефонот му беше пронајден кај Марена, покрај реката Луда Мара, и тука завршуваат сите информации поврзани со исчезнувањето на Миле.

Не успеаја да го најдат ниту кучињата-трагачи, ниту обемната потрага со хеликоптер и дронови. Останаа забележани сведоштвата на семејството дека имал планови, поврзани со работата, бидејќи во слободното време се занимавал и со лимарска работа, имал договорено и судење на спортски натпревар.

„Без пасош, без мобилен телефон, без пари кај себе, во работничка облека, каде би можел да замине?“ – прашуваа негови сограѓани, кои во голем број беа вклучени во потрагите кои се одвиваа секојдневно во првите недели од исчезнувањето.

Нови детали за случајот, официјално, не се објавени. Остануваат неговите лични податоци и фотографија објавени на страницата за исчезнати лица на МВР, а во Неготино, мало место каде граѓаните меѓусебно се познаваат, исчезнувањето на Тодоров останува мистерија.

Во градот се уште не е решен и случајот со исчезнувањето на Коце Панов, по кого се трага од ноември 2022 година. Во време на исчезнувањето тој имал 79 години. За овој настан едно лице беше приведено, па потоа ослободено, и до денес не се дозна што се случило со пензионерот.