Откако Апелациониот суд ги зголеми казните за дел од обвинетите за трагедијата што се случи во 2019 година кај Ласкарци кога загинаа 16 патници во неисправен автобус на „Дурмо турс“, предметот е вратен во Кривичниот суд и се спремаат упатни акти за осудените да одат в затвор.

-Предметот е вратен на понатамошно постапување во одделението за санкции каде се изготвуваат упатни акти за упатување на издржување казни затвор- велат од Кривичен.

Според процедурата, по донесување на второстепена пресуда, предметот со списите вклучително со второстепената одлука се враќа до првостепениот суд кој е надлежен за достава на второстепените одлуки до странките.

Откако пресудата ќе стане правосилна и извршна, постапката продолжува пред надлежен судија за извршување на санкциите на првостепен суд, односно постапката за упатување на издржување на казна затвор со правосилна и извршна пресуда е уредена со Законот за извршување на санкциите која постапка ја спроведува судија за извршување на санкциите на првостепен суд.

За разлика од пресудата на Кривичниот суд кој ги осуди на пониски казни сопственикот на „Дурмо турс“ Дурмиш Белули, а највисока затворска казна доби возачот на автобусот Маноил Трифуновски, Апелација го осуди сопственикот на десет години затвор, а на возачот му изрече иста затворска казна.

Белули и шефот на возниот парк на „Дурмо турс“ Ремзи Мифтари се осудени на по десет години затвор, а претходно Белули беше осуден на четири години затвор, а Мифтари на шест години затвор.

Вработените во техничкиот центар на „Дурмо турс“ Игор Ѓорѓиевски и Горан Дуковски според одлуката за Апелација се осудени на седум години затвор, кои претходно беа осудени на по пет години затвор. Единствено неизменети остануваат затворските казни за возачот Маноил Трифуновски и Јане Бобаровски кои добија затворски казни од 14, односно пет години затвор.

Несреќата кај Ласкарци беше една од првите трагедии кога автобусот на „Дурмо турс“ изгуби контрола и падна во дупка покрај автопат. Според обвинението, сопственикот на „Дурмо турс“, Дурмиш Белули, своите автобуси ги прегледувал во станица за технички преглед која е во негова сопственост. Законот тоа му го дозволувал оти биле различни правни субјекти, иако фирмите имале ист сопственик.

На техничкиот преглед пред несреќата било утврдено дека сопирачките на автобусот функционираат делумно. Оваа пресуда е правосилна и обвинетите треба да одат на издржување на затворската казна.