Џихадистичката група Хурас ал Дин – сириски огранок на Ал Каеда – соопшти денеска дека се распушта, велејќи дека одлуката е донесена по падот на режимот на Башар ал Асад, јавија светските медиуми.

Групата, која се наоѓа на американската листа на терористички организации, посочи дека самораспуштањето е „одлука на главната команда на Ал Каеда во согласност со развојот на ситуацијата во Сирија“.

Коалиција од бунтовнички групи, предводена од радикалното исламистичко движење „Хајат Тахрир ал Шам“ (ХТШ), на 8 декември ја презеде власта во Дамаск по соборувањето на Башар ал Асад. Новата сириска влада најави разоружување на вооружените групи.

„Хурас ал Дин“, која вклучува странски џихадисти, беше стационирана во планинските предели на северозападна Сирија – област што долго време се сметаше за бунтовничко упориште, пред Дамаск да падне во рацете на бунтовниците.