Општина Илинден започна со реконструкција на главната улица во Мралино, во рамки на Проектот за подобрување на патната инфраструктура, изградба, реконструкција, санација и рехабилитација на локалните улици и патишта. Како што информираат од локалната самоуправа, станува збор за капитален проект кој опфаќа реконструкција на главната улица во Мралино во должина од 650 метри и изградба на пешачка патека по должина на целата улица и ширина од 1,5 метри.

Увид во градежните работи направи градоначалникот на општина Илинден, Александар Георгиевски кој истакна дека со реконструкцијата на оваа улица се овозможуваат подобри услови за граѓаните и значително ќе се придонесе за поголема безбедност на учесниците во сообраќајот, пешаците и велосипедистите.

– Со изградбата на улицата на граѓаните значително им се подобруваат условите за живот во нивното секојдневно функционирање. Се подобрува секојдневната комуникација на граѓаните од овие населени места со административниот дел на Општината и значително се намалува времетраењето на патување до нивните работни места – информираат од Општина Илинден од каде што најавуваат и дека, во наредниот период ќе продолжи да инвестира во безбедноста на сообраќајот и унапредување на истиот, со што ќе бидат реконструирани и изградени повеќе улици, патишта, пешачки и велосипедски патеки во повеќе населени места.