Во тек е расчистувањето на дивата депонија зад катната гаража во Буњаковец. Ангажирана е соодветна механизација и камиони за отстранување на отпадот, меѓу кој има токсични материјали, азбестни плочи и друг опасен отпад што претставува сериозна закана за здравјето на жителите и животната средина, соопштија од Општина Центар.

Местото несовесни граѓани подолг период го користеле како магацин-депонија каде се складирал најразличен отпад, а тоа се наоѓа во непосредна близина на станбени згради и спортското игралиште во рамки на училиштето „Песталоци“, велат од општината.

„Се работи за дива депонија која со години наназад била заградена и присвоена, невидлива за граѓаните, а во неа се складирал секаков вид отпад. Нашите инспекции лоцираа и други слични диви депонии и смет во околината. Планираме нивно целосно отстранување и уредување на просторот“, додаваат оттаму.