На германските пратеници во Бундестагот денеска им биле доставени докази собрани од германски разузнавачи кои пресретнале радиокомуникации во кои руски војници меѓусебно зборувале за убиства на цивили во Украина, пренесува германски „Шпигел“.

„Шпигел“, кој цитира извори од германското разузнавање, пишува дека разговорите се однесуваат на злосторствата во Буча, кои предизвикаа меѓународен гнев и беше главна причина за исфрлањето на Русија од Советот за човекови права на ОН.

Претходната недела, во градот Буча, кој се наоѓа близу Киев, беше пронајдена масовна гробница и тела на цивили низ улиците. Се верува дека меѓу жртвите има и жени и деца.

Западните лидери остро го осудија масакрот, тврдејќи дека станува збор за воено злосторство.

Германски „Шпигел“ исто така пишува дека на снимените разговори руските војници дискутираат како испрашувале украински војници и цивили пред да ги застрелаат.

Во еден од разговорите се слуша глас на Русин како зборува за убиство на лице кое било на велосипед. Меѓу фотографиите од Буча што го обиколија светот е и една од леш покрај велосипед.

Според германските разузнавачи, снимените разговори ги потврдуваат извештаите дека во убиствата учествувале и платеници од групата „Вагнер“.