По повеќе од три децении работа во кошарката, едно од највлијателните имиња во македонската женска кошарка, Перо Стамески става точка на својата блескава тренерска кариера и заминува во пензија.

Кошаркарскиот клуб Бадел 1862, кој некогаш настапуваше под името Вигор Скопје, ја потврди оваа вест преку емотивна порака, со која му оддаде почит на човекот кој 36 години бил неизбежен дел од клупската историја и двигател на многу кошаркарски приказни.

„Со голема почит и емоции соопштуваме дека тренерот Перо Стамески, човекот кој не само што ја испиша историјата на нашиот клуб, туку и ја обликуваше иднината на многу генерации кошаркарки – заминува во пензија“, стои во соопштението на клубот.

Стамески зад себе остава импресивно наследство: девет шампионски титули, шест куп-трофеи и бројни успеси во младинските категории, но и можеби уште поважно, влијание врз генерации млади спортистки, кои преку неговото водство ги поставија темелите на своите спортски и животни кариери.