Надолни очекувања за инфлаторните движења, умерен раст на бруто-домашниот производ и поголема кредитна активност, се очекуваат во наредниот период за македонската, но и за глобалната економија, е заклучокот од изнесените анализи на 11-тиот „Ерсте инвеститорски појадок“.

Нина Неданоска, заменик-претседател на УО на Шпаркасе банка, која е дел од групацијата Ерсте енд Штаермеркише Шпаркасе, вели дека очекувањата за економски раст во држава се должат токму на надолните очекувања на инфлаторните движења, но и на планираната инвестициска активност.

– Тоа се позитивни фактори. Исто така, веќе се реализираа очекуваните намалувања на каматните стапки, а тоа на локално ниво се прелева со забавено темпо. Намалувањето на каматите ќе доведе до зголемување на кредитната активност, иако таа, за волја на вистината, и досега е на високо ниво – рече Неданоска.

Таа посочи дека минатата година била најдобра за Шпаркасе банка со актива од 1,5 милијарди евра, што е раст од 13 проценти во однос на 2022 година, кредитното портфолио е зголемено за 13,5 проценти, а за 35 проценти е зголемен бројот на клиенти во однос на 2022 година.

Ана Митреска, вицегувернер на НБРСМ, рече дека намалувањето на инфлацијата се очекува да продолжи и во 2025 година, кога најверојатно централните банки ќе ја постигнат целната инфлација.

– И покрај намалувањето на инфлацијата, постојат повеќе ризици што се поврзани со поголемата инертност кај цените на услугите, растот на платите и расположливиот доход, можни притисоци на страната на понудата, како и поддршката од фискалната политика. Фискалниот одговор во неколкуте изминати кризи ја поддржа економијата, но истовремено ги зголеми нивоата на дефицитите и на јавниот долг. Притоа, во регионот се забележуваат извесни подобрувања кај дефицитот и јавниот долг, но сè уште се над претпандемиското ниво. Во следниот период суштински ќе биде да се остане на патот на фискалната консолидација – рече Митреска.

Таа посочи и дека во 2023 година профитите на корпоративниот сектор пораснаа во однос на 2022 година.

– Пазарот забележа раст на профитните маржи – исто така забележа вицегувернерката.

Рајнер Сингер, раководител на Главни пазари и кредитни истражувања, Ерсте груп банк АГ, изјави дека Еврозоната многу бавно закрепнува од шоковите, но дека пријатно изненади неочекуваниот раст на германската економија. Тој презентираше и дека економскиот раст во третиот квартал во Еврозоната е 0,4%, дека очекуваната инфлација во 2024 година е 2,4, но дека во 2025 година Еврозоната ќе го достигне таргетот на економистите, инфлација до 2 проценти.