Градоначалникот на Благоевград, Методи Бајкушев во средата се сретна со амбасадорката на Република Северна Македонија, Агнеса Руси Поповска и претставници на Македонско-бугарската стопанска комора, објави бугарскиот портал Пиринско.

Во фокусот на средбата бил развој на бизнисот и промоција на инвестициите од двете страни, едукативна и културна размена, а била нагласена и взаемна подготвеност за заеднички иницијативи и кампањи за развој на билатералната соработка во сите сфери на јавниот живот.

– Апсолутен приоритет за Општина Благоевград е надградба на добрите односи со Република Северна Македонија – рече градоначалникот Методи Бајкушев и презентираше конкретни идеи за идна соработка.

Неговата изјава, како и средечниот пречек на македонската амбасадорка предизвикаа низа негативни коментари за градоначалникот на Благоевград, а бугарската партија ВМРО-БНД побара негова оставка, бидејќи, велат градоначалникот на Благоевград, Методи Бајкушев „демонстрира сервилност кон антибугарското Скопје“!

Повод за оваа политичка реакција беше акцијата на градоначалникот на Благоевград, поточно топлиот пречек на македонската амбасадорка, Агнеза Руси Поповска.

– Ние во ВМРО сметаме дека говорот на градоначалникот на Благоевград што го пренесува „Продолжуваме со промените – Демократска Бугарија“ многу потсетува на наведената „надградба“ на односите на Кирил Петков со Скопје. Мораме да запомниме дека оваа надградба доведе до укинување на ветото пред две години, што беше проследено со репресија врз Бугарите и нивните организации во Северна Македонија и одбивање да се вклучат Бугарите во уставот – вели Милен Михов, потпретседател на ВМРО-БНД.

Михов додава дека градоначалникот на Благоевград се понижил и „извршува нечија политичка нарачка, која не е во интерес на граѓаните на општината, регионот и цела Бугарија“.

– Посетата на амбасадорот на РСМ на Благоевград, која што коинцидира со уште една провокација на Христијан Мицкоски за македонското национално малцинство во Бугарија, не е случајна. Оваа иницијатива ги покажува обидите на Скопје да се претстави како бранител на правата на Македонците во Пиринскиот регион, а изјавите што ги сервира Бајкушев пред амбасадорот во Благоевград, кога во Скопје ја исмеваат Бугарија, е понижувачко и за самата личност и за политичката партија што ја застапува. Македонската пропаганда ќе ги претстави постапките на градоначалникот на Благоевград како доказ за симпатиите на Македонците во Бугарија кон Скопје како контрапункт на „официјалната бугарска политика“ – категоричен е потпретседателот на ВМРО,  Милен Михов.

– Методи Бајкушев, немате ли барем малку достоинство и чувство за национална припадност или се чувствувате дел од Пиринска Македонија, во која „Бугарија ги асимилира Македонците“ (според зборовите на новиот премиер на РСМ )?, реагираше новинарката на Труд, Викторија Георгиева.

Самиот Бајкушев ден по средбата со македонската амбасадорка ја прикачи реакцијата од својата матична партија Продолжуваме со промените и напиша на Фејсбук: „Набргу по мојата денешна средба со амбасадорот на Северна Македонија, дознав дека премиерот на Северна Македонија“ дал апсолутно неприфатливи изјави.

– Ако Северна Македонија сака да го продолжи својот пат кон Европската Унија, нејзината нова влада мора да ги исполни меѓународните обврски. ПП-ДБ во никој случај нема да поддржи преговарање за францускиот предлог и отфрлање на условот Скопје да ги вклучи Бугарите како државотворен народ во својот Устав за да може да ги започне преговорите за влез во ЕУ. Францускиот предлог беше усвоен од 27-те земји-членки на ЕУ и беше изгласан во бугарскиот и македонскиот парламент на 24 јуни и 16 јули 2022 година, соодветно. Властите во Скопје мора да сфатат дека нивниот европски пат минува низ почитување на правата на луѓето со бугарска самосвест во Северна Македонија, реагираше партијата ПП-ДБ на изјавите на македонскиот премиер Мицкоски дека „бугарски диктат нема да помине додека е тој премиер“.

Главчев: Ќе инсистираме ЕУ да ги потврди заклучоците за Република Северна Македонија