Во собраниската Комисија за финансирање и буџет денеска почна расправата за ребалансот на Буџетот за 2025 година, во второ читање, за кој се поднесени над 200 амандмани, а 160 од нив се поднесени од пратеничката група на СДСМ, и предлагаат издвојување пари за семејствата на настраданите во пожарот во Кочани.

Како што кажа на прес-конференција пратеничката Сања Лукаревска, со поднесените амандмани предлагаат распределување на 934 милиони денари, или нешто над 15 милиони евра за финансиска поддршка за семејствата на загинатите и повредените во Кочани, 60 милиони денари за реновирање на болницата во Кочани и 20 милиони за нова опрема во болницата во Кочани, зголемување на студентски стипендии и поддршка за студенти од ранливи семејства, бесплатен превоз за ученици во руралните средини.

„Овој ребаланс ја разоткрива вистината дека економијата тоне, граѓаните се оставени сами на себе, а власта продолжува да се луксузира додека ги задолжува идните генерации. Нема пари за соодветно и заслужено покачување на платите на работниците, за поголеми плати во образованието, здравството. Нема пари за повредените и семејствата на настраданите во Кочани. Нема пари за нови мерки за заштита на стандардот на граѓаните, за намалување на цените. Граѓаните се оставени сами на себе. Владата крати пари од “, рече Лукаревска.

Таа додаде дека граѓаните се оставени сами на себе, додека пак Владата, како што вели, крати пари од граѓаните за да има повеќе пари за луксузирање на функционерите.