СДСМ има јасен став по однос на промената на изборниот модел, нагласи портпаролката на партијата, Богданка Кузеска, одговорајќи на прашањето дали партијата ќе влезе во преговори со политичките соперници околу евентуални измени за Изборниот законик.

– Една изборна единица за парламентарните избори и отворени листи за локални избори е јасен став на СДСМ, за којшто се залага веќе подолго време. Но, со политиките што ги води Христијан Мицкоски било кој изборен модел да биде утврден уште еден изборен пораз му е неизбежен, вели Кузеска.

Претходно, претседателот на ВМРО-ДПМНЕ, Христијан Мицкоски, во гостувањето во „Само интервју“, истакна дека сега е време да се разговара за изборната материја.

– ВМРО-ДПМНЕ принципиелно е против да се менува изборниот модел, за една изборна единица, неколку месеци пред избори. Тоа значи дека ние сега можеме да седнеме и да разговараме за промена на изборниот модел. Зошто да не биде пола-пола? Да речеме, да имаме 60 мнозински изборни единици и една изборна единица којашто ќе даде 60 пратеници. Зошто да не зборуваме за 120 мнозински пратеници?, кажа Мицкоски.