Сатја Грабулоски, македонскиот дизајнер познат по изработката на уникатни и оригинални патики за светски спортски и музички имиња, направи нешто неверојатно. Тој и неговиот тим дизајнираа јакна од вегански материјали,  на која го исцртаа ликот на Брајан Адамс, а која канадскиот музичар ја доби по концертот во Скопје во неделата.

На јакната, тимот на „SWithaDot“ работел околу 180 часа. Освен ликот на славниот пејач, на самата јакна е испишан и насловот на неговиот најнов сингл„Roll Up the Punches“.

Грабулоски, кој низ годините правеше чевли и патики за многу славни музичари, вклучувајќи ги Дуа Липа, Стив Аоки, Мајли Сајрус и многу други, изјавил:

„Јакната е рачно составена од потврдени вегански материјали, бидејќи Брајан Адамс е веган. Целиот процес на составување, а потоа и на сликање, траеше приближно 180 часа рачна работа на целиот наш тим. Темата на дизајнот е неговиот последен сингл „Roll Up the Punches“, а идејата да направиме јакна за Адамс, наместо патики, потекна од мојата мајка, која ја обожава неговата музика. Инаку, „SWithaDot“ веќе 6 години за секој истакнат уметник кој ќе ја посети Македонија подготвува „Добредојде во Македонија“ (Welcome to Macedonia) рачно насликан подарок, со идеја да му покажеме дека земјата во која доаѓа го цени, но и да го рашириме талентот на нашите македонски уметници низ светот. Таков беше и случајот со Брајан, чија реакција беше искрена, со огромна насмевка и восхит. Очекуваме да ја носи на некој од неговите следни настапи“, пишува „Црнобело“.