Во присуство на дипломатскиот кор, претставници на Министерството за надворешни работи и локалната власт во Прилеп беше отворено почесното конзуларно претставништво на Украина во Република Северна Македонија. Функцијата почесен конзул на Украина ќе ја извршува Сашо Наумоски, генерален директор на Витаминка, стопанственик кој долги години придонесува во развивање на економските релации меѓу двете земји.

„Да се претставува земја која во моментов се соочува со воена агресија е голема одговорност бидејќи довербата што ми се дава во вакви моменти е навистина знак на голема почит. Во овие времиња да се биде пријател е голема чест, да се даде доверба е доблест, а јас во моментов ги имам двете од страна на Украина “, истакна почесниот конзул Наумоски.

На отворањето на почесното конзуларно претставништво се обрати и амбасадорката на Украина, Лариса Дир.

„За време на војната на Русија против Украина, заштитата на интересите на Украина, граѓаните на Украина и нејзините правни лица во земјата домаќин во границите дозволени со меѓународното право не е лесна задача“, истакна амбасадорка Дир.

Ова е прво вакво претставништво во Прилеп и дополнително го зголемува значењето и улогата на билатералните односи. Дипломатските односи меѓу Украина и Македонија беа воспоставени во 1995 година.