Комисијата за станбени прашања при Влада на РМ три пати ја одбива апликацијата на самохрана мајка за добивање социјален стан. Иако ваква апликација помеѓу останатите категории, можат да поднесат и самохраните мајки, на Елена Павлеска од Скопје усно и било кажано дека не ги исполнува критериумите бидејќи не е социјално загрозена и не е корисник на социјална помош.

– Три пати поднесував барање за да добијам социјален стан, и постојано ме одбиваат. Кога прашав зошто не сум повисоко бодувана, со цел системот да ме препознае како лице на кое му е неопходен социјален стан, добив устен одговор дека не сум социјален случај, и дека треба најмалку шест месеци да бидам невработена и да земам социјална помош. Побарав во писмена форма да ми го достават образложенито, меѓутоа писмен одговор се уште немам добиено. Јас навистина имам проблем да си го обезбедам станбеното прашање. Не можам ниту да помислам да купам стан со комерцијална вредност, бидејќи банките ме сметаат за кредитно неспособна, раскажува Елена.

Според неа треба да се направи разлика помеѓу одвоено родителство во кое двајцата родители се живи и самохрани родители кои останале сами по воља на судбината.

-Мојот сопруг е починат, и голема е разликата помеѓу одвоено родителство и самохраните роители. Јас не примам алиментација, сама сум со моите деца и немам каде да живеам. Затоа и ми е толку чудно што шефот на Комисијата за станбени прашања и останатите кои имаат право на глас, ги отфрлат од системот самохраните мајки како мене, вели Павлеска, мајка на две деца од кои едното е со посебни потреби.

„Слободен печат“ од свои извори дознава дека Комисијата за станбени прашања при Влада на РМ одлучила да им го скрати правото на самохраните родители да добијат социјален стан. Ова се однесува на разведените родители, а не и за оние чиј сопружник починал. Образложението е дека родителите кои се разведени можат да си обезбедат станбено прашање, но често пати го злоупотребуваат нивниот брачен статус со цел да се стекнат со имот. Оделе дури и до таму што правеле фиктивни разводи само за да добијат стан од државата.

Зошто била донесена оваа одлука прашавме кај претседателот на Комисијата, министерот за транспорт и врски, Благој Бочварски. Од неговиот кабинет кратко ни одговорија дека Комисијата распределбата ја врши врз основ на строго утврдена методолигија. 

– Во 2020 со новиот Закон за социјална заштита се утврдија нови категории на ранливи групи. Врз основа на тој закон направена е нова методолгија за распределба на социјални станови. Има систем за распределба. Заинтересираните аплицираат преку центрите за социјална работа, ги доставуваат документите кај нас а електронскиот систем врши одлука според бодирање, велат од Министерството за транспорт и врски.

Од друга страна од Министерството за труд и социјална политика, каде што се направени измените во Законот за социјална велат дека направена е разлика во термините според која „самохран родител“ е родител кој сам ги врши родителските права и должности за детето, поради тоа што другиот родител е непознат, починат или исчезнат.

-Согласно  Законот  за социјалната заштита, „Самохран родител“ е родител кој сам ги врши родителските права и должности за детето, поради тоа што другиот родител е непознат, починат, исчезнат или од оправдани причини привремено или трајно не ги извршува родителските права и должности. На оваа категорија на граѓани, доколку се социјално необезбедени им се овозможува да добијат социјален стан, но потребно е да се државјани на Република  Северна Македонија, со постојано место на живеење во општината и општините на Градот Скопје каде е изграден социјалниот стан и без стан во лична сопственост, на брачниот другар и на полнолетните членови на неговото заедничко домаќинство на територијата на Република Северна Македонија, велат од МТСП.