Меѓународниот ден за одбележување на геноцидот во Сребреница предизвика нови обвинувања меѓу актуелната и поранешната власт. Во Владата не било планирано одбележувањето на 11 јули, иако Македонија беше коспонзор на Резолуцијата за Сребреница изгласана во Обединетите нации и е воспоставен Меѓународен ден за сеќавање. Владата на Димитар Ковачевски ниту испланирала ниту одвоила средства за одбележување на овој ден.

Македонија не воспостави ден за сеќавање на геноцидот во Сребреница и единствено Собранието утре  институционално ќе го одбележи 11 јули. Поранешни владини функционери за „Слободен печат“ велат дека поранешното Министерство за политички систем и односи меѓу заедниците не било надлежно да има програма и финансии за одбележување на тој ден и дека чествувањето требало да биде во организација на Агенцијата за остварување на правата на заедниците. Од Агенцијата, пак, негираат дека тоа е во нивна надлежност.

Од Владата за „Слободен печат“ велат дека според програмата за работа и во согласност со буџетот за работа на Министерството за политички систем, од кое сега е настанато Министерството за односи меѓу заедниците, нема никаква планирана програма ниту е планиран буџет за активности за одбележување на Меѓународниот ден на сеќавањето на геноцидот во Сребреница.

– Според буџетот, предвидени се само средства за финансирање на одбележувањето на 13 август – Денот на потпишувањето на Рамковниот договор во висина од 6.000.000 денари и обележување на Денот на албанската азбука – 22 ноември, за што се предвидени средства во висина од 3.800.000 денари во буџетот на Министерството. Тоа се единствените активности на Министерството, со што станува повеќе од очигледно изоставувањето на другите заедници, не само од програмата на Министерството, туку и воопшто од третман на Министерството кон нив и нивните потреби – велат од Владата.

Поранешен функционер од Министерството за политички систем за „Слободен печат“ вели дека за помалите заедници надлежна е Агенцијата. Тој додава дека кога се формирало Министерството, Агенцијата одбила да биде под негова надлежност, односно дека сакале да функционираат независно и дека не побарале средства од Министерството за одбележување на 11 јули.

Поранешен функционер од Агенцијата, пак, вели дека пред коспонзорството на Македонија на Резолуцијата за Сребреница, практика било Собранието со пригодна комеморација да го одбележи сеќавањето на геноцидот во БиХ. Според него, Владата не организирала никакви настани за 11 јули, само некои министерства преку соопштенија или објави на Фејсбук го одбележувале тој ден.

– Но, сега имаме нов момент. Македонија беше коспонзор на Резолуцијата и новата Влада требаше да востанови меѓународен ден на сеќавање на геноцидот. Претходната влада не можеше да планира средства или програма, зашто не знаевме кога во ОН ќе се гласа Резолуцијата. Владата на Косово вчера воспостави Ден на сеќавање. Сметам дека новата Влада нема политичка волја за да воспостави меѓународен ден за Сребреница. Македонското Собрание во 2010 година донесе Декларација за поддршка на Резолуцијата на Европскиот парламент за Сребреница. Со донесувањето на Декларација, Собранието одлучи соодветно да го одбележи 11 јули – Денот за сеќавање на геноцидот во Сребреница. Поранешниот претседател на Собранието го одбележуваше Денот со комеморација. Добро е дека и новиот претседател Африм Гаши за денеска закажа комеморација – вели поранешниот функционер.

Иако побаравме, во врска со одбележувањето на 11 јули не добивме став од новиот вицепремиер за односи меѓу заедниците Иван Стоиљковиќ.

Претседателот на Собранието Гаши за утре закажа „Одбележување на 11 јули – Меѓународен ден на сеќавање на геноцидот во Сребреница во собраниската салата „Борис Трајковски“. Според агендата, воведно обраќање ќе има претседателот Гаши, а по него ќе се обратат професорот Џемил Бектовиќ, Мерсиха Смаиловиќ од Здружението Диванхана, пратеникот Амар Мециновиќ, како и професорот Сеад Џигал и Сафет Бишевац. Ќе се зборува и за „Законодавните предизвици во имплементирањето на новата Резолуција на ОН со која се осудува негирањето на геноцидот и величење на воените злосторници“.
Бошњачкиот национален совет (БНС) го организира традиционален комеморативен „Марш за Сребреница“, а Општина Чаир и бошњачката заедница оддадоа почит на жртвите, на настан кај споменикот посветен на жртвите од геноцидот во Сребреница кој се наоѓа во паркот Чаир. Меѓу присутните кои им одадоа почит на жртвите беа првиот вицепремиер Изет Меџити, пратениците од Вреди Мерита Колчи Коџаџику и Беким Сали, како и градоначалникот на Чаир Висар Ганиу.

Коспонзорството на Македонија за Резолуцијата за Сребреница која ОН ја усвои во мај годинава, го иницираше ексминистерот Бујар Османи без консултации со експремиерот Ковачевски и поранешниот шеф на државата Стево Пендаровски. Коспонзорството на Резолуцијата ги затегна односите со Србија.