Американскиот претседател Џо Бајден е решен да постигне прекин на огнот во Газа и да направи договор за заложници со Хамас, а во исто време се обидува да ги деескалира тензиите на границата на Израел со Либан, изјави денеска советникот за национална безбедност на Белата куќа, Џејк Саливан.

„Тој апсолутно не се откажа“, рече Саливан во интервју за Ем-ес-ен-би-си неколку часа пред Бајден да се обрати пред Генералното собрание на ОН за последен пат како американски претседател.

Бајден ќе работи со светските лидери собрани во Њујорк за да се постигне договор за прекин на огнот и за заложниците во Газа за да се спречи сеопфатна војна на Блискиот Исток, рече Саливан, пренесе Ројтерс.

Тој призна дека има предизвици во постигнувањето на конечната цел кога станува збор за израелскиот премиер Бенјамин Нетанјаху и лидерот на Хамас Јахја Синвар, но додаде дека Хамас и Синвар особено „не сакаат да постигнат договор“.

„Но, ние сме решени да продолжиме со тоа“, рече Саливан.

Според него, конфликтот со Хезболах на северната граница на Израел на неколку пати се активираше и смируваше.

„Но, ние го спречивме тоа во тие претходни покачувања на тензиите и верувам дека сè уште можеме да најдеме начин да постигнеме деескалација меѓу Израел и Либан и да донесеме дипломатско решение што ќе им овозможи на луѓето да се вратат во своите домови“, рече Саливан.