САД  ги распоредија разорnувачот УСС Хигинс и борбениот брод УСС Синсинати на околу 30 наутички милји од Скарборо Шол во Јужното Кинеско Море, два дена откако кинески воен брод се судри со крајбрежната стража додека се обидуваше да блокира филипински патролен брод.

Инцидентот беше снимен на видео, што предизвика реакции од западните и азиските земји, објави Ројтерс.

Јапонија, Австралија и Нов Зеланд изразија загриженост поради „опасните и непрофесионални маневри“ од страна на кинеските бродови и повикаа на деескалација и почитување на меѓународното право.

Филипинскиот комодор Џеј Тариела рече дека немало инциденти за време на распоредувањето на САД и ги повтори обвинувањата дека Кина со години спроведува „ризични маневри и блокади во спорни води“.

Тој исто така рече дека за време на извидничкиот лет, кинескиот борбен авион извршил опасни маневри во близина на филипинскиот авион, при што во еден момент прелетал на висина од околу 61 метар. Скарборо, на северозападниот дел од Филипините, е предмет на територијален спор меѓу Кина и Филипините, а права врз спорните води бараат и Виетнам, Малезија, Брунеи и кинескиот регион Тајван.

Вашингтон постојано повторува дека ќе ги брани Филипините во случај на вооружен напад, вклучително и инциденти во Јужното Кинеско Море, истакнува Ројтерс.