– САД и Израел се многу блиску до договор за планот на американскиот претседател Доналд Трамп за завршување на војната во Газа, по разговорите меѓу специјалниот пратеник Стив Виткоф, зетот на Трамп, Џаред Кушнер, и израелскиот премиер Бенјамин Нетанјаху, изјави новинарот на Axios, Барак Равид, во објава на социјалната мрежа X, повикувајќи се на неименуван висок американски функционер.

Равид додаде дека Хамас сè уште треба да се согласи, објави Ројтерс.

„Американскиот претседател Трамп ми рече во интервју во неделата дека преговорите за неговиот план за завршување на војната во Газа се во завршна фаза и нагласи дека договорот би можел да го отвори патот за поширок мир на Блискиот Исток“, рече Равид.

Трамп претходно изјави дека се надева дека ќе го финализира нацрт-мировниот план за Газа на средбата со Нетанјаху денес.

Американскиот претседател оцени по средбата со арапските лидери во петокот во Њујорк дека преговорите за завршување на борбите во Газа се интензивни и продуктивни и дека ќе продолжат сè додека е потребно.