Рускиот амбасадор во Белград, Александар Бочан-Карченко денеска изјави дека Русија, која претседава со Советот за безбедност на ОН овој месец, ќе се заложи за дискусија за формирање на Заедницата на општините со мнозинско српско население на Косово.

Во изјавата испратена до медиумите, рускиот дипломат рече дека Кремљ е посветен на продуктивна дискусија во СБ за суштината на проблемите кои се навистина акутни за Србите, а еден од нив рече дека тоа е и Заедницата на српски општини, јавува Klankosova.tv.

Тој, исто така, посочува дека во пресрет на седницата на Советот за безбедност на ОН за ситуацијата на Косово, српскиот претседател Александар Вучиќ „со право го нагласува проблемот со теророт на косовските албански радикали врз Србите, кој продолжува“.

Бочан-Карченко подвлече дека европските посредници во дијалогот меѓу Косово и Србија „повторно ја покажале својата нечесност“ и праша зошто постои таква хистерија и закани од ЕУ кон Србија.

„Европските посредници повторно ја покажаа – очекувано – својата нечесност. На барање на Приштина (Брисел не само што му служи на режимот на Киев, туку и на самопрогласениот режим на Приштина) почнаа да му се закануваат на Белград со санкции за неисполнување на некои митски меѓународни обврски кои наводно произлегуваат од предлозите на ЕУ за решавање на прашање на Косово“, за кои се разговараше во Брисел и Охрид“, потсетува рускиот амбасадор во Србија.