Подморници на руската и кинеската морнарица за прв пат спроведоа заеднички подводни патроли во водите на Тихиот Океан, соопшти денес прес-службата на Руската тихоокеанска флота.

„Подморници на руската морнарица и Народноослободителната армија на Кина за прв пат учествуваа во заедничко патролирање во Азиско-пацифичкиот регион“, се наведува во соопштението, пренесува РИА Новости.

Подводната мисија започна на почетокот на август, веднаш по завршувањето на заедничката руско-кинеска воена вежба.

Руското Министерство за одбрана ги наведува зајакнувањето на поморската соработка меѓу двете земји, зачувувањето на мирот и стабилноста во Азиско-пацифичкиот регион, надзорот на морскиот простор и заштитата на објектите на поморската економска активност на Русија и Кина како клучни цели на заедничкото патролирање.

Исто така, се забележува дека морнарите на двете земји редовно вежбаат маневрирање и меѓусебна координација за време на заедничките вежби.

Првата заедничка руско-кинеска поморска патрола на бродови се одржа во 2021 година.