Руски разузнавачки агент и бугарски шпион во Обединетото Кралство настојувале да му постават „медена стапица“ на бугарскиот наградуван новинар Христо Грозев, па дури и да го грабнат, за да престане да пишува за разузнавачките активности на Русија.

Ова го тврдела обвинителката Алисон Морган пред Централниот кривичен суд на Англија и Велс на отворањето на процесот против организаторите на шпионската мрежа.
Рускиот агент Руперт Тич, кој всушност е пребеганиот австриски бизнисмен Јан Маршалек, разменувал пораки со водачот на шпионската ќелија, бугарскиот државјанин Орлин Русев, за начините да се елиминира новинар Грозев, кој работел за истражувачкото биро „Белингкет“.

Првичниот план, според обвинителите, бил да се намами 64-годишниот новинар во врска со 30-годишната Вања Габерова, вработена во салон за убавина во Лондон.

Првиот охрабрувачки сигнал за мисијата било реакцијата на новинарот, кој брзо го прифатил повикот за пријателство од Габерова на платформата Фејсбук.

– Се чини дека се закачи и се вљуби во Вања. Можеме да продолжиме бавно кон романса. Да туркаме за средба – забележал Русев во септември 2021 година.

Маршалек возвратил да не се брза и „да не се потценува типот и неговата параноја“, но Русев притискал да се стегне обрачот околу пленот.

– Можеме да снимиме нешто и за Порнхаб… Ни требаат силни и независни девојки со самодоверба. Вања е полна со самодоверба и силно независна, вистинска секси кучка – инсистирал Русев, изјавила британската обвинителка пред поротата.

Габерова била во тимот што го следел Грозев на конференција на „Белингкат“ во Валенсија. Биле снимани и анализирани неговото однесување и контактите со други лица што се „од интерес на Русија“. Притоа било забележано дека новинарот се однесува крајно претпазливо и дисциплинирано. Тој секогаш запирал со разговорот со соговорникот кога покрај нив ќе поминело трето лице, а се појавувал на појадоците како „швајцарски часовник“, секогаш во исто време и на иста маса.

Четириесет и шестгодишниот Русев и кообвинетиот Бисер Џамбазов на отворањето на процесот признале вина за „планирање шпионски активности во полза на Русија“. На клупата за обвинети се и бугарската државјанка Габерова, 33-годишната Катрин Иванова и 39-годишниот Тихомир Иванчев. Обвинителството тврди дека целата група во изминатите три години била вклучена во шест операции против „лица од интерес за Русија“. Грозев бил цел поради неговите истражувачки текстови за разоткривање на руските врски при труењето на двојниот шпион Сергеј Скрипал и неговата ќерка Јулија во англискиот град Салисбери во 2018 година и при соборувањето на патничкиот авион на „Малезија ерлајнс“ над Украина во јули 2014 година.

Грозев во 2021 година бил следен низ Бугарија, во Виена, во Валенсија и во Црна Гора, но тој лично не видел никого освен Габерова, која ја запознал на Фејсбук.

Иванова го следела Грозев уште во авионот до Валенсија, каде што ѝ се придружиле Габерова и Џамбазов. Тројцата резервирале соба во истиот хотел, па дури и го пречекориле буџетот за 1.900 фунти само за да имаат соба на истиот кат.

Грозев бил следен и во 2022 година, во лет на „Визер“ од Виена до Црна Гора. Иванова постојано го снимала со камера скриена во очила.

Резервните планови на групата, ако не го улови Грозев во „медената стапица“, биле да го ограбат, да му запалат имот, да го грабнат и да го одведат во Москва, па дури и да го убијат. Маршалек ги одбивал екстремните опции, со забелешките дека „тоа не е добра идеја“ и „може да предизвика проблеми“.