Русија верува дека е важно да се спречи нова ескалација во врска со нуклеарната програма на Иран и дека приоритет е да се најде конструктивен дијалог меѓу вклучените страни, соопшти денес Министерството за надворешни работи на таа земја.

„Веруваме дека е важно да се спречи нова ескалација околу нуклеарната програма на Исламската Република Иран, која, како што покажа надворешната агресија врз Иран во јуни оваа година, ќе има сериозни последици за меѓународниот мир и безбедност“, се вели во соопштението објавено од РИА Новости.

Се додава дека моменталната приоритетна задача е да се најде дијалог меѓу вклучените страни, со цел да се најде решение и да се спречи нова конфронтација околу иранската нуклеарна програма.

„Примарна задача денес е обновување на конструктивниот дијалог меѓу вклучените страни и фокусираното колективно барање решенија што ќе ни овозможат да избегнеме нова криза“, нагласува руското Министерство за надворешни работи.

Велика Британија, Франција и Германија вчера го информираа Советот за безбедност на Обединетите нации за започнувањето на механизмот за обновување на меѓународните санкции против Иран, кои беа укинати со нуклеарниот договор од 2015 година.

Санкциите не стапуваат на сила веднаш, а нацрт-резолуцијата за продолжување на укинување на санкциите мора да се стави на гласање во Советот за безбедност на ОН.
Доколку таква резолуција не се усвои во рок од 30 дена, санкциите ќе бидат повторно воведени.