Русија тивко гради воена база на островот Врангел, арктички остров на кој право полагаат и  САД, тврди колумнистот Брендон Вајхерт од американскиот весник „Нешнл Интерес“.

Во статијата се истакнува дека станува збор за „спорно руско упориште“ – комплексот „Ушаковское“, кој вклучува модерна радарска станица „Сопка-2“, инфраструктура за војската, аеродром, касарни, складишта за гориво и комуникациски центри.

Според авторот, радарот е способен да ги следи американските и авионите на НАТО во речиси реално време на растојание до 350 километри, како и да ѝ овозможи на Русија да го контролира Северниот морски пат.

„Ова претставува врв на копјето во агресивното натрупување на Русија на Арктикот“, нагласува Вајхерт.

Тој истакнува дека базата се наоѓа околу 300 милји западно од Алјаска, што, тврди тој, ја прави „сериозна еколошка и геополитичка закана“.

Авторот потсетува дека островот Врангел бил откриен од руска експедиција во 1823 година, додека САД го барале во 1881 година според Законот Гуано. Американското знаме наводно било подигнато на островот во 1921 година, но територијата наскоро била вратена под советска контрола.

Вајхерт пишува дека „иако американските тврдења биле отфрлени со текот на времето, тие не биле формално повлечени“, додавајќи дека Стејт департментот не го истражувал прашањето уште од администрацијата на Џорџ В. Буш.

Руските медиуми објавија дека во 2019 година, руските радиотехнички трупи на Врангел спровеле вежби со радарската станица Сопка-2, потврдувајќи го трајното присуство на Москва во тој дел од Арктикот.